لا تتسرع بالانكار .. وتقول انك
رمز الشرف والوطنيه وتحيا الثورة , فقط اجب على الاختبار الذى تم وضعة للتفرقه بين
المواطنين العاديين وفلول النظام السابق ربنا يعزك انت والسامعين , ومتقولش لحد عن
النتيجة واكتمها فى سرك احسن لك .
. الاختبار .
1- لما تشوف عمرو حمزاوى على
شاشة التليفزيون بيفكرك بأيه ؟
أ- بان الليبراليين وصلوا .
ب- بأن عمرو حمزاوى قد فلت من بين
يدى الاخوان والسلفيين ودخل المجلس .
جـ- بيفكرك بانك لازم تروح
للحلاق الخصوصي بتاعك وتحلق شعرك .
2- بتعمل ايه لم يوقفك شرطى
المرور ويسألك عن حزام الامان ؟
أ- تهرب منة بعربيتك بسرعة .
ب- تتدفع الغرامة وانت ساكت .
جـ- تنسى وتطلع لة كارنية الحزب
الوطنى .
3- لما حد يقولك يا باشا بتحس
بأيه ؟
أ- بتاخد مقلب فى نفسك وتصدق
انك باشا .
ب- تتحسر على ايام الحزب الوطنى
ايام العز والبشويه بصحيح .
جـ- بتعرف ان اللى بيقولك يا
باشا بيضحك عليك وبيقرطسك .
4- لما كنت بتشوف خطبة الريس
على التليفزيون بتعمل ايه ؟
أ- ما بيعجبكش الكلام وتغير
المحطة فورا .
ب- ما بيعجبكش الكلام بس ما
بتغيرش المحطة وتسيب التليفزيون وتمشى .
جـ- بتقعد تتفرج على الخطبة
وانت مزبهل لحد عيونك ما توجعك وتدمع .
5- ايام الانتخابات اللى فاتت عملت
أيه ؟
أ- رحت تنتخب ووقفت فى الطابور
زى باقى الناس .
ب- رحت تنتخب واستنيت حد من
المرشحين لما يديلك فلوس علشان تصوت لة .
جـ- مقاطع الانتخابات لأنك مش
متعود على الديموقراطيه الحقيقية .
6- بتعمل اية لما تشوف توفيق
عكاشة على قناة الفراعين ؟
أ- تحتار هو مع مين وضد مين .
ب- بيجيب لك صداع نصفى هيجننك .
جـ - بيفكرك بالذى مضى لما باس
يد صفوت الشريف .
5- لو مسكوا فى عمارتكم حرامى
بتعمل ايه ؟
أ- تسلموه للشرطة فورا .
ب- تاخدوا اللى سرقة وتسيبوة
لحالة .
جـ- تسأله بينك وبينة اذا كان
معاه كارنيه الحزب الوطنى القديم .
6- تعمل اية لما تفتكر ان رجالة
هتلر بعد الحرب هربوا من المانيا ؟
أ- ما بتعملش حاجة خالص .
ب- بتسأل نفسك هى فين المانيا
دي .
جـ- بتفكر انك تهرب انت كمان
وتشوفلك بلد .
7- كارنيه الحزب الوطنى بتاعك
عملت فيه ايه ؟
أ- حرقته بجاز وسخ .
ب- رميته من الشباك .
جـ- مخبية فى مكان امين لعل
وعسى ايامه تعود تانى .
8- بتعمل اية لما تشوف فيلم
لسوبرمان ؟
أ- بتقول لنفسك ان امريكا فيها
العجب .
ب- بتقلد سوبرمان وتلبس فوطة
وتنط من البلكونة .
جـ- بتفكر تتصل بسوبرمان علشان
يجي ينقذ الريس .
9- لو نزلت الانتخابات وسقط
فيها بتعمل ايه ؟
أ- بتحس ان البلد خسرت راجل ما
يتعوضش زيك .
ب- بتعترف انك طول عمرك فاشل ومافيش
فايدة .
جـ- بتعتصم وتقطع السكة الحديد
انت وزمايلك من فلول الحزب الوطنى .
10- بتعمل اية لما تشوف محاكمة
الريس واولادة ؟
أ- غلطوا فى حق الوطن ولازم
يتحاكموا .
ب- بتغير المحطة وتتفرج على
الحلقة 520 من المسلسل التركي .
جـ- بتخاف تيجي رجلك فى الموضوع
وتدخل معاهم القفص يا معلم.
11- لو كنت قاعد على القهوة
والناس كانت بتشتم على حكومة الريس والحزب الوطني بتعمل ايه ؟
أ- تشتم معاهم وتسب وتلعن .
ب- تسمع وانت ساكت وتقول يا
حيطة داريني .
جـ- تقول فى نفسك الا ليت ايام
الحزب الوطنى تعود يوما لتخبرها بما فعل الغوغاء .
12- هتعمل اية بعد ما وصل
التيار الاسلامي للحكم ؟
أ- تبتدي تصلى وتلتزم .
ب- تربي لحيتك وتنضم لحزب النور
او الحرية والعداله .
جـ- تتوب على كنت بتعمله ايام
الحزب الوطنى الله لا يرجعها تانى .
13- اذا شفت نفسك فى حلم قاعد
مع الريس فى القفص تعمل ايه ؟
أ- تزعق بصوت على وتقول انا برئ .. انا برئ .
ب- تسلم عليه وتحضنه .
جـ- تصحا من النوم مفزوع وتحمد
ربنا انه كان حلم .
14- لما شفت احداث بورسعيد شعرت
بأيه ؟
أ- زعلت واعلنت الحداد على
الفيسبوك .
ب- عرفت بذكائك ان العملية
مدبرة .
جـ- طرت من الفرح وغنيت والله
وعملوها الرجالة .
15- لما بتشوف احمد عز بيفكرك
بأيه ؟
أ- بفيلم الراقصة والطبال .
ب- بأنة طموح وطموحة وداة فى
داهية .
جـ- بالحزب الوطنى ايام العز
والهنا .
16- لما كنت بتشوف نظيف على
التليفزيون كنت بتعمل ايه ؟
أ- بتشوف انة فاشل ومنظف جيوب
المصريين .
ب- بتقعد تتفرج على حواجبه
البيضا وشفايفه الكبيرة وسيقانة الطويلة .
جـ- بتتبسط من كلامة وتقول ايوة
كدا يا نظيف .
17- لما جارك يبصلك بطريقة مريبة
بتفكر فى أيه ؟
أ- تقول لنفسك انه نظرة ضعيف
وما بيشوفش كويس .
ب- بيبصلك لأنة شاكك في انك سرقت
ملابسة الداخلية من على الحبل .
جـ- هو عارف حقيقتك وانك من
رجال الحزب الوطنى وانك متخفي .
18-- لما بتعدى على ميدان
التحرير بتفكر في ايه ؟
أ- بتفتكر ثورة 25 يناير
المجيدة .
ب- بتقعدلك فى خيمة وتعتصم
علشان تاخدلك قرشين .
جـ- بتلعن ايام الثورة اللى
خربت بيتك انت وامثالك من رجال النظام السابق .
19- فى العيد بتقول اية لما تيجى تعيد على حد ؟
أ- عيد سعيد .
ب- كل عام وانتم بخير .
جـ- عيد مبارك .
20- تحب شعار الشرطة الجديد يكون ايه ؟
أ- الشرطة فى خدمة الشعب .
ب- الشرطة والشعب فى خدمة الوطن .
جـ- الشرطة والشعب والوطن فى خدمة صاحب السعادة .
19- فى العيد بتقول اية لما تيجى تعيد على حد ؟
أ- عيد سعيد .
ب- كل عام وانتم بخير .
جـ- عيد مبارك .
20- تحب شعار الشرطة الجديد يكون ايه ؟
أ- الشرطة فى خدمة الشعب .
ب- الشرطة والشعب فى خدمة الوطن .
جـ- الشرطة والشعب والوطن فى خدمة صاحب السعادة .
. النتيجة .
ضع 3 نقاط للأجابة (أ) .
ونقطتين للأجابه (ب) . ونقطة واحدة للأجابة (جـ) .
- اذا حصلت على 60 نقطة , فهذا
معناه انك مواطن عادى وشريف .
- اذا حصلت على مابين 50-60
نقطة , فهذا معناه انه لديك ميول للنظام السابق ولكنك ماشي مع التيار .
- اذا حصلت على ما بين 40-50
نقطة , فهذا معناة انك حاسس بحاجة غلط بس مش عارف هي ايه بالظبط .
- اذا حصلت على ما بين 30-40
نقطة , فهذا معناة انه لديك مشاكل عقلية لا يمكن السكوت عليها .
- اذا حصلت على م بين 30-20
نقطة , فهذا معناة انك من فلول النظام السابق ولازم تستخبى اليومين دول او تتوب عن
اللى فات .
ليست هناك تعليقات:
إرسال تعليق